Nur noch einmol mem Papp e Bäumche kaufe jonn,
nur noch einmol janz opjerääch öm vier Uhr morjens opstonn,
nur noch einmol spingkse durch et Schlüsselloch,
en et Wohnzimmer eren – oh, wat jöv ich dröm?
Oh du schöne Weihnachtszick,
ich setz am Finster un drieh die Uhr zoröck.
All die Momente, all die Bilder, stecke janz deef en mir drin,
Hellichovend, do kann ich noch ens Kind sin!
Ming Auge leuchte – wenn ich nur dran denk,
wie de Wunderkääze brannte, als et Jlöckche endlich erklingk.
Wie stolz der Papp wor, wenn der Klein sich hätt jefreut,
un de Mamm vör Jlöck – heimlich en der Köch – e Trönche hät verdröck…
Oh du schöne Weihnachtszick,
ich setz am Finster un drieh die Uhr zoröck.
All die Momente, all die Bilder, stecke janz deef en mir drin,
Hellichovend, do kann ich noch ens Kind sin!
Un hück es alles anders, Papp un Mamm die sin nit mieh,
un jrad op Hellichovend do deiht dat furchbar wieh.
Doch wenn ich dann minge Klein sinn, wie hä strahlt, wenn et Jlöckche klingk,
un ich heimlich en Tron verdröcke, dann weiß ich: Alles hätt ne Sinn!
Oh du schöne Weihnachtszick,
ich setz am Finster un drieh die Uhr zoröck.
All die Momente, all die Bilder, stecke janz deef en mir drin,
Hellichovend, do kann ich noch ens Kind sin!
Dä Klein lurt jede Morje es der Wunschzeddel ald weg?
Su wue jede Advent, en der janz besinnliche Zick.
Et Bäumch steight un et Huus es jeschmöck,
ich kann et ald spüre - et Chresskind es nit mieh wigg weg...
Un ejal wat kumme weed,
wat die Zokunf uns och bringk:
Mir stonn zesamme, wenn Kölle zor Weihnachtszick singt!
Weihnachte es för jede Minsch op der Ääd,
jet janz anderes, et jeiht dröm, wat mer drus määt.
Un woran du auch jläuvs, unger'm Stäänezelt,
Nit nur Hellichovend wör Fridde et Bess' op der Welt ...
Un ejal wat kumme weed…
(Bridge)
Weihnacht - wie ich et kannt als Kind,
es die Jrößte un die Schönste Erinnerung en mir drin,
och wenn ich hück weiß, dat weed nie mieh su sinn...
Et janze Huus stink noh Raclette,
un de Pänz sin nit mieh janz su nett,
de Papiertonn quillt övver
un do bes einfach nur satt un platt…
…om Sofa fessjewaaße,
keine Minsch es op der Stroße,
t’jitt keine Zweifel, welche Daach hück es,
och wenn do keine Kalender häs:
Et es der zweite Weihnachtsdaach,
joot, dat et nit noch mieh jitt.
Et es der zweite Weihnachtsdaach,
weil et langsam ald wieh deiht:
Esse, esse, drinke, drinke,
schlofe, schlofe, winke, winke,
zick der hellige Naach.
Ich weede nit mieh richtig wach,
am zweite Weihnachtsdaach.
En janze Flut vun Jeschenke,
steiht jetz röm op de Schränke,
et dritte Pärche Weihnachtssocke,
saach, wat han ich bloß verbroche.
Doch aff morje weed et anders,
ich mache Sport und Diät,
han ich mir jraad om Sofa övverlaat,
zumindest bes Silvester kütt…
Et es der zweite Weihnachtsdaach,
joot, dat et nit noch mieh jitt.
Et es der zweite Weihnachtsdaach,
weil et langsam ald wieh deiht:
Esse, esse, drinke, drinke,
schlofe, schlofe, winke, winke,
zick der hellige Naach.
Ich weede nit mieh richtig wach,
am zweite Weihnachtsdaach.
De Zick, se es verflore,
wo sin all die Johre,
saach, han mer uns nit irjendwo
schon ens jesinn?
Jrad en d’r dunkle Johreszick,
do merk mer schnell, de Uhr se tick,
manchmol schneller,
als mer et verdeent…
Ald widder es Advent, un de Kääze, se brenne,
eetz eins, dann zwei, dann drei, dann vier!
Un wenn et fünfte Kääzje brennt,
dann häste Weihnachte verpennt,
do luurste nur, do määste nix,
jo et es wohr un keine Wetz:
wenn et fünfte Kääzje brennt,
dann häste Weihnachte verpennt,
dröm pass op, un jeff joot Aach,
et jitt nur ein hellije Naach!
Em Ähnz, et es verröck,
wie schnell dat all doch jeiht,
de eetzte Weihnachtsplätzche,
jitt et längs ald em Aujuss.
Doch do schöddle mer me’m Kopp,
un jonn durch der Supermaat,
weil mer su ne Krom,
doch lang noch nit bruch.
Ald widder es Advent, un de Kääze, se brenne,
eetz eins, dann zwei, dann drei, dann vier!
Dä Duff vun Plätzcher em Treppehuus,
verjess ich sicher nit,
su wie die Buchping, weil de Omma mir
zevill zom Probiere jitt.
Wat hätt de Mamm jeschand,
als se en mingem Zimmer soh,
dat der Adventskalender
schon am dritte Daach komplett jeplündert wor.
De Johre trecke en et Land,
un ich denk noch immer jään dodran,
wie ich noch ahn der Weihnachtsmann
jejläuv han.
Janz heimlich maat ich mich naaks op,
jing en et Wohnzimmer eren,
weil der Wunschzeddel
doch immer noch do looch.
Ich luurte us däm Finster
kunnt die rusa Wolke sinn,
dä Zauber spür ich hück noch,
luur ich en d‘r Ovendhimmel eren.
De Johre trecke en et Land,
un ich denk noch immer jään dodran,
wie ich noch ahn der Weihnachtsmann
jejläuv han.
[Bridge]
Wievill Weihnachtsfeste weed em Leeve ich wohl noch han?
Wievill Kääze brenne ens för mich?
Wie off klingk noch e Jlöckche, wenn die hellije Naach fängk ahn?
Wie off setz ich noch he met üch am Desch?
Wunderkääze brenne,
un et Weihnachtsfess, dat es vorbei.
De letzte Stunde em Johr,
jehüre einfach nur uns zwei.
Dose-Sekt, heiße Jedanke,
en Bockwoosch vun der Tanke
nä mer bruche ech nit vill,
bes se bejinnt – die letzte Rund vum Spill.
Neues Johr, neues Jlöck,
immer wigger, Stöck för Stöck,
neues Johr, neues Jlöck,
et wood och Zick.
Neues Johr, neues Jlöck,
un et kütt kein Sekund zoröck,
alles neu, alles frisch,
Pross Neujohr – op dich un mich!
Jo jo jo jo, Pross Neujohr – op dich un mich!
Jo jo jo jo, Pross Neujohr!
Dat Feuerwerk do övver’m Rhing,
künne mer vun unserem Sofa sin,
En Tiefkühlpizza, die pass och
öm zwei noch en der Ovve ren.
Statt Jlitzerkleid un Smoking,
drät mer hück Joggingbutz,
tja, et kann nur besser weede,
aff jetz do weed jede Chance jenutz!
Neues Johr, neues Jlöck,
immer wigger, Stöck för Stöck,
neues Johr, neues Jlöck,
et wood och Zick.
Neues Johr, neues Jlöck,
un et kütt kein Sekund zoröck,
alles neu, alles frisch,
Pross Neujohr – op dich un mich!
Jo jo jo jo, Pross Neujohr – op dich un mich!
Jo jo jo jo, Pross Neujohr!
Versöök niemols, Liebe zo erkläre,
versöök niemols, Jeföhle zo verstonn.
Et kütt vüür, dat Zweifel ahn dir zehre,
un ding Jedanke durch Jammertäler jonn.
Un es och alles Driss,
verjiss nie - dat do jet janz Besondres bes!
Nemm dich su, wie do bes,
denn wie do bes, su bes do joot,
et Schönste an dir bes do.
Un sprich su zo dir selvs,
als wörste frisch en dich verknallt,
dann wees do zofredde alt.
Do wees sin, am Engk bliet alles besser,
och d’r Mohnd kann jlänze wie de Sunn.
Manchmol sin affjelaufene Stroße wirklich ätzend,
trau dich ruhig ens ne neue Wääsch ze jon.
Un do kanns sicher sin,
ohne die Schläächte, wören die joode Zigge halv su schön!
Nemm dich su, wie do bes,
denn wie do bes, su bes do joot,
et Schönste an dir bes do.
Un sprich su zo dir selvs,
als wörste frisch en dich verknallt,
dann wees do zofredde alt.
Vun wääje stille Naach,
met fuffzehn Mann am Köchedesch,
vun wääje hellije Naach,
de Wäng, se waggele en der Köch.
Söße Jlockeklang, dat kann doch jeder,
doch ich persönlich mach et su vill leever:
Zwesche de Johr – jo, jo,
wenn et wirklich still weed
un der Weihnachtsstress verflüch.
Zwesche de Johr – jo, jo,
es de schönste Zick,
dann bruch ich nur e bessje Rauh – un dich!
Op der Jesus röf der Opa,
un hevv dobei sie Jlas
un nit nur Rudolf hätt am Eng
en knallruude Nas!
Och Verwandte dat sin Minsche, stellt der Ludwig widder fess,
doch för mich do es eetz Weihnachte, wenn et Fess vörbei es.
Zwesche de Johr – jo, jo,
wenn et wirklich still weed
un der Weihnachtsstress verflüch.
Zwesche de Johr – jo, jo,
es de schönste Zick,
dann bruch ich nur e bessje Rauh – un dich!
Nur do un ich, nur ich un do,
un keiner dä jet säät!
Un et schönste Jeräusch, en der Weihnachtsnaach es,
wenn de Familich de Düür – vun usser widder zomäät…
Zwesche de Johr – jo, jo, ...
Zwei Ringe us Jold, en nem schwazze Säckche us Samt,
halt ich janz weich en minger linke Hand.
Zwei Ringe, die verzälle, vun ner jlöckliche Zick,
die schingk jetz su wick weg.
Vun Liebe, Vertraue, un aff un zo och Stress,
vun Freud un vun Leid, wie et Levve halt su es,
vun Johre, die üch verbinge, fass e Levve lang,
als Symbol för et Jlöck, wat och immer jrad kohm.
Die Fotos vun domols, wenn ich se hück sinn,
dann fällt mer su manches us minger Kinderzick en,
un dat Laache vun üch, do op dem Huhzicksbild,
dat säät alles – die Ääd stund koot still.
Zwei Ringe us Jold, hatts do ahn dinger Hand,
bes zo dingem letzte Daach, bes die letzte Stund broch ahn,
ich halt se su lang, wie ich se halde kann,
zwei Ringe us Jold en nem schwazze Säckche us Samt.
Ich halt se su lang, wie ich se halde kann,
zwei Ringe us Jold en nem schwazze Säckche us Samt.
Immer dann, wenn et still weed,
wenn ming Hand durch di Fell jeiht,
wenn do schnurrs un dich räkels,
ben ich nit allein.
Wenn die Kääze längs brenne,
un die Minsche verzälle,
wie et Chressfess fröher wor,
bes do för mich do.
Ich bruch kei Päckche, han kei Bäumche stonn,
et schönste Jeschenk es, dat mir uns han.
Kumm mer fange der Wind, sag däm himmlische Kind,
dat mer zwei ungerwääs zo de Stääne sin.
Durch Raum un durch Zick un mer kumme eetz zoröck,
wenn mer wisse wo’t litt, dat Weihnachtsjlöck.
Ach wat künns do all verzälle,
wat häs do nit all jesinn.
Do bes all ding sibbe Levve,
schon an minger Sick.
Minsche kohme un jinge,
do hoots mich kriesche un singe,
un worste och näächtelang fott,
do kohms immer zoröck.
Hellichovend do funkle ding Auge noch mieh,
als söns en der Naach – hey, kumm met mir…
… un mer fange…
Winterzick, stille Zick,
et Johr jeiht flöck, nix kütt zoröck.
Winterdaach, stille Naach,
han he un do – ahn dich jedaach.
Un wie’t wohl wör, wörs do noch bei mir,
et Levve es e Kaatehuus,
et Hätz-Ass han ich ungerschätz,
weil ich daach, dat do noch mieh sin muss.
Winterzick, stille Zick,
et Johr jeiht flöck, nix kütt zoröck.
Manchmol sin do Momente,
wo der Boddem unger dir einfach opjeiht,
dann fälls do deef un landest hatt,
eetz dann weiß do, wo do wirklich steihs.
Winterdaach, stille Naach,
han vill ze off – ahn dich jedaach.
Also streun ich einfach wigger,
ming Finger friere kääler, als mi Hätz.
Ming Schritte leis, ich han der Zidder,
weil ich kapier, dat wor et jetz.
Winterzick, stille Zick,
et Johr jeiht flöck, nix kütt zoröck.
Winterdaach, stille Naach,
han vill ze off – ahn dich jedaach.
Winterzick, stille Zick,
et Johr jeiht flöck, nix kütt zoröck.
Janz opjerääch zündt‘ der Klein et dritte Kääzje ahn,
et es nit mieh lang bes zom hellije Fess.
Beim Fröhstöck do klingelte dann et Telefon,
met ner Stemm die saat, dat do et jetz jeschaff häs.
För jede Minsch kütt irjendwann die Zick,
ich stell kein Froge un erinner mich zoröck.
Un an nem Daach, su still wie hück,
wenn der Winter langsam kütt,
setz ich he met jlänzende Auge, janz besinnlich,
un denk an dich.
Et es nie leich, ze bejriefe, dat wer jonn muss,
jrad wemmer su dran hängk, fällt et besonders schwer.
Doch vielleich es et ne Truus, dat mer nit fott es,
denn Erinnerunge blieve för immer deef en mir.
Leev Mamm, jetz hätt der Papp dich widder em Ärm
un es et drusse noch su kalt, ich weiß bei üch es et schön wärm…
Un an nem Daach, su still wie hück, ...